Ururka adrdayda Somaliyeed ee Woqooyiga America & shirkoodii Columbus, Ohio.

 

Shir waynihii 3aad ee ardayda Somaliyeed ee reer North America (USA & Canada) ayaa ka dhacay magaalada Columbus, Ohio. North American Somali Student Union waa urur ay ku midoobaan ardayda soomaiyeed ee Maraykana iyo kuwa Canada. Ururkaan waxaa la aas aaskiisa bartamihii sanadkii 2003, hasa ahaatee waxaa si buuxdo dhidibada loogu aasay August 2004.

Shirkaan sanadlaha ah ee sida xiisaha badan loo soo abaabulay ayaa waxaa kasoo qayb galay arday tiradoodu boqollaal kor u dhaaftay oo ka kala timid Goblallo kala duwan oo Maraykanka ah iyo Canada. Iyada oo shirarkii hore ee ururka lagu qabanjiray gobalka Minnesota, ayaa sanadkaan waxaa si qurux badan u soo maamuusay marti galinta shirka ururka ardayda Somaliyeed ee reer Ohio, kaas oo magiciisa loo yaqaano Ohio Somali Student Association, ururkaan oo si toos-ah u hoos tago ururka wayn ee (NSSU).

Ujeedada shirka ayaa waxay ahayd, wacyi galin guud, wacdi diineed, aqoon iswaydaarsi, iyo walibo doorashadii sanadlaha ahayd ee ururka (NSSU). Shirka ayaa ahaa mid 3 cisho socday ayna ka soo qayb galeen kana hadleen dad banan oo isugu jira, Professarro Somaliyeed, Culamaaudiin, Hogaamiye jaaliyadeed, Arday iyo walibo hooyooyin. Waxaa sidoo kale shirka ka soo qayb galay Cabdi Bile Cabdi oo ah shaqshi magac dheer ku dhex-leh ummada Somaliyeed iyo dhamaan dunida inteeda kale.

Waxaa marti sharafka shirka kahadshay ka mid ahaa, Cabdi Bile Cabdi, oo kuhaysta biladda dahabka ciyaaraha 1500 mitir, Aqoonyahan sare Professor Warsame Cali,PhD Elecrical Engineering, A&M University oo mashariic dhawr ah la fuliyey hay'adda cirbixiyeenada Maraykanka ee NASSA; Professor Sulaymaan Guleid, PhD (madaxwaynaha Camuud University), Dr. Cabdinuur Mohamed,PhD, Ohio University, iyo xubno kale oo muhiim ah. Aqoonyahanadaan iyo ximna kale oo kulanka ka hadlay ayaa waxay ardayda iyo guud-ahaanbo bulshada ku baraarujinayeen kuna wacyigalinayeen sidii ay qurbaha wax uga qabsan lahaayeen ayga oo ardayda gaar-ahaan kala hadlaayay sidii ay waxbarashada iyo midnimada dhexdooada ah oogu dadaali lahaayeen. Sidoo kale mutacallimiinta ayaa waxay ardayda u sheegayeen in ay ardaydu yihiin rajada kaliya ee ay Somali leedahay, tan Eebe ka sokoow.

Maalintii Axadda ahayd 08/14/05 ayaa waxay ardaydu galeen doorasho aan innabo caadi ahayn taas oo u soconaysay nooca demoqiraadiga ah ee loo yaqaanno “Secret pallet” taas oo loo tartamaayay Shanta golaha sare ee ururka hagi lahayd sanadka nagu soo aaddan. Jagooyinka loo kala tartamay ayaa waxay ahaayeeen: Madaxwayne, madxwayne xigeen, xog-haye, qasnaji, iyo xariiriye (coordinator).

Jagada madaxwanaha ayaa waxaa ku soo baxay tartan adag ka dib Mr. Mohamud Hassan Cilmi, oo ah arday deggan Columbus, Ohio, oo dhigta Jaamacadda Franklin University oo barta Business Administration iyo Organizational leadership. Madaxwayne xigeenka ayaa waxaa ku soo baxday gabadha layiraahdo Maymun Cilmi Nageeye oo deggan Louisville, Kentucky, oo dhigata University Of Louisville (UOL), baratana Biology and psychology. Xog-haya ayaa waxaa ku soo baxday Mabruuk, oo ayadana deggan isla magaaladaas Louisville, Kentucky, dhigatana isla Jamacadda (UOL) baratana Nurse. Sidoo kale Jagada xisaabiyaha, Mohamed Ali, ah arday deggan Magaalada Columbus, Ohio, dhigtana Columbus State Community College, kana barto Accounting. Sidoo kale Jagada agaasimaha ayaa waxaa ku guulaysta Faysal Mohamed oo daggan Magaalad Toronto, Canada, dhigtana Jaamcadda Carlton University.  

Kooxdaan kuguulaysatay doorashada ardayda ayaa waxay si fir-fircoon u qeexeen sida ay doonayaan in ay ku hagaan ururka haddii loo doorto taas oo ay ku qanciyeen ardaydii dooranaysay.

Gebegebadii, shirka waxaa ereyo qiiraleh ka joodiyay madax waynaha cusub Mr. Mohamud Xassan Cilmi asaga oo ka codsaday ardayda iyo dhammaan  bulshada Somaliyeed in ay lashaqeeyaan, la’aantoodna uusan guul ururku gaari karin. Sidoo kale, madaxwaynahay ayaa sheegay in ay Somaliya raja wayn leedahay maadaamay dhalinyaradu ay yihiin hoggaamiyayaasha mustaqbalka kuwaas oo maanta si xushmad iyo demuqraadi ah ku doortay hoggaankooda isagana raali noqday kuna faataxaystay go’aankoodii.

Siwalbabo ha ahaatee shirkaan ayaa wuxuu ahaa mid aad loo soo agaasimay, si qurux badanna u socday billow ilaa dhammaad. Dadwaynihii iyo ardaydii ka soo qayb galay shirkaan ayaa waxaa ka muu qanaysay xamaasad iyo qiiro waddani nimo.

Alldalka.com

Columbus, Ohio